Հաճախորդների իրավունքներ

Տեղեկատվություն ստանալու իրավունք

Հաճախորդների իրավունքներում առանցքայինը տեղեկատվություն ստանալու իրավունքն է։ Համաձայն «Վարկային կազմակերպությունների մասին» ՀՀ օրենքի 141-րդ հոդվածի 3-րդ կետի` ցանկացած անձ իրավունք ունի դիմել «Կրեդիտ Կոնցեպտ» ՈՒՎԿ ՓԲԸ-ին և ստանալ հետևյալ տեղեկատվությունը:

• Կազմակերպության ֆինանսական հաշվետվությունների /առնվազն վերջին տարեկան/ և դրանց վերաբերյալ արտաքին աուդիտի եզրակացության պատճենները,
• Կազմակերպության պետական գրանցման վկայականի և կանոնադրության պատճենները,
• Թարմացված տեղեկություն` վարկային կազմակերպության կողմից վարկերի տրամադրման և հաճախորդների համար իրականացվող ֆինանսական գործառնությունների վերաբերյալ, այդ թվում` տոկոսադրույքներ, ծառայության վճարներ, ժամկետայնություն և այլ էական պայմաններ:

Ինչպե՞ս ստանալ տեղեկատվություն

Միևնույն ժամանակ, յուրաքանչյուր անձ իրավունք ունի նաև ստանալ այլ տեղեկատվություն։ Այս դրույթը կանոնակարգված է «Հաճախորդների բողոքների քննության գործընթացը կարգավորող ներքին իրավական ակտերին ներկայացվող նվազագույն պայմաններ և սկզբունքներ» կանոնակարգ 8/04–ի 8-րդ կետի (բողոքների ընդունման և քննության վերաբերյալ ներքին կանոնները):

Ցանկացած տեղեկատվություն ստանալու համար անհրաժեշտ է գրավոր կերպով և էլեկտրոնային եղանակով ներկայացնել դիմում։ Հաճախորդը պատասխանը կստանա իր կողմից նշված էլ. փոստի հասցեին անվճար կամ առձեռն՝ գլխամասային գրասենյակից, սահմանված պատճենահանման վճարները վճարելուց հետո հնգօրյա ժամկետում:

Իրավունքների պաշտպանություն

Հաճախորդների իրավունքների պաշտպանությունն իրականացվում է ՀՀ դատարանների, ինչպես նաև Ֆինանսական համակարգի հաշտարարի կողմից:

• Դատարան դիմելու դեպքում Ձեր և «Կրեդիտ Կոնցեպտ» ՈՒՎԿ ՓԲԸ-ի միջև առաջացած վեճը լուծվում է դատարանի կողմից: Դուք կարող եք դիմել դատարան բողոքի քննության ցանկացած փուլում: Դատարանի որոշումը չի կարող վերանայվել Ֆինանսական համակարգի հաշտարարի կողմից:
• Ֆինանսական համակարգի հաշտարարին դիմելու դեպքում Ձեր և «Կրեդիտ Կոնցեպտ» ՈՒՎԿ ՓԲԸ-ի միջև առաջացած վեճը լուծվում է Հաշտարարի կողմից` համաձայն ՀՀ «Ֆինանսական Համակարգի Հաշտարարի» մասին օրենքի: Ֆինանսական Համակարգի Հաշտարարի ծառայություններն անվճար են: